కొత్త 'బ్లూ జోన్'.. ఇక్కడ మహిళలు వందేళ్లు జీవించడం చాలా కామన్!

ఇటలీలోని సార్డీనియా దీవిలో ఉన్న బోలోటానా అనే ఒక చిన్న పర్వత గ్రామం ఇప్పుడు ప్రపంచ దృష్టిని ఆకర్షిస్తోంది. ఇక్కడి మహిళలు అసాధారణంగా వందేళ్లకు పైగా జీవిస్తుండటంతో, ఈ ప్రాంతాన్ని కొత్త "బ్లూ జోన్" (శతాధిక వృద్ధులు అధికంగా నివసించే ప్రాంతం)గా పరిశోధకులు గుర్తించారు. పురుషుల దీర్ఘాయుష్షుకు ప్రసిద్ధి చెందిన పాత బ్లూ జోన్‌కు భిన్నంగా, బోలోటానా మహిళల ఆరోగ్యానికి, వారి సుదీర్ఘ జీవితానికి నిలువుటద్దంగా నిలుస్తోంది.

సస్సారీ, అలబామా విశ్వవిద్యాలయాల పరిశోధకులు సంయుక్తంగా జరిపిన ఒక అధ్యయనంలో ఆశ్చర్యకరమైన విషయాలు వెలుగులోకి వచ్చాయి. బోలోటానా గ్రామంలో 70 ఏళ్ల వయసుకు చేరుకున్న మహిళల్లో ఏకంగా 13.8% మంది 100 ఏళ్ల మైలురాయిని దాటుతున్నారని ఈ అధ్యయనం తేల్చింది. మహిళల దీర్ఘాయుష్షు విషయంలో ప్రపంచవ్యాప్తంగా హాంకాంగ్ తర్వాత బోలోటానా రెండో స్థానంలో ఉంది. ఇటలీ జాతీయ సగటు (సుమారు 3.5%)తో పోలిస్తే ఇది దాదాపు నాలుగు రెట్లు అధికం.

2025 నాటికి, సుమారు 2,266 మంది జనాభా ఉన్న ఈ గ్రామంలో 12 మంది శతాధిక వృద్ధులు ఉండగా, ఇది సార్డీనియా సగటు కంటే 12 రెట్లు ఎక్కువ. వారిలో ప్రస్తుతం ఆరుగురు జీవించి ఉండగా, వారంతా మహిళలే కావడం విశేషం. వారిలో ఇద్దరి వయసు 102 ఏళ్లు. రాబోయే రెండేళ్లలో మరికొంతమంది వందేళ్ల క్లబ్‌లో చేరతారని అంచనా వేస్తున్నారు.

'బ్లూ జోన్' భావనకు సహ సృష్టికర్త, ఈ పరిశోధన బృందానికి నాయకత్వం వహించిన గియోవన్నీ మారియో పెస్ మాట్లాడుతూ, "గత 25 ఏళ్లలో సార్డీనియాలోని సాంప్రదాయ బ్లూ జోన్ వెలుపల ఒక కొత్త దీర్ఘాయుష్షు హాట్‌స్పాట్‌ను కనుగొనడం ఇదే మొదటిసారి" అని తెలిపారు. ఇక్కడి మహిళల ఆయుర్దాయం పశ్చిమ దేశాల మహిళలతో పోలిస్తే మూడు రెట్లు ఎక్కువగా ఉందని ఆయన పేర్కొన్నారు.

ఈ అసాధారణ దీర్ఘాయుష్షుకు కచ్చితమైన కారణాలను పరిశోధకులు వెల్లడించనప్పటికీ, కొన్ని అంశాలను ప్రస్తావించారు. శతాధిక వృద్ధులైన అక్కాచెల్లెళ్లు ఇప్పటికీ కలిసే జీవిస్తూ, ఎలాంటి మతిమరుపు లేకుండా ఆరోగ్యంగా ఉన్నారని, వారి మధ్య బలమైన సామాజిక బంధాలు ఉన్నాయని పెస్ గమనించారు. మరోవైపు, గ్రామ మేయర్ మాట్లాడుతూ.. పరిశుభ్రమైన ఆహారం, కలుషితం కాని సహజ వాతావరణం, చిన్నప్పటి నుంచి రోజూ కిలోమీటర్ల కొద్దీ నడిచే జీవనశైలి వారి ఆరోగ్య రహస్యాలని అభిప్రాయపడ్డారు.